Luk 24 | MMX | STEP | No mene maxantamak suubu at laaleng avot ap mo luik, lavakin digat pas uto at lamaaut, digap kip levendan mavak diga lox agagas li vam i.

Luke 24

Laxakatu Kaxat Amlong At Ne Iesu

(Mt 28:1-10; Mk 16:1-8; Jo 20:1-10)

1 No mene maxantamak suubu at laaleng avot ap mo luik, lavakin digat pas uto at lamaaut, digap kip levendan mavak diga lox agagas li vam i. 2 Diga ven lagalii uat lentaba vetpes diga xavun pes pam i boro at lungusungus at nom lamaaut; 3 la diga beles ukeneng, ketla di goxo ven lenget ka labantuxu at Leeme Silok ne Iesu. 4 Diga tu go la diga rakdu aleng mumu i na, la soso mun legepu radi mi leventamon atdu gam games aleng, duga ru saparap di. 5 La diga umsu mi lanmarat, la diga xis tiktikbu mi lempatgulom atdi to xopok at laxangka, la luradi duga lok tidi, “Tila mi puse ri laradi mo i rooro nade at loxot at labarongan? 6 Neni xopmen i de; neni ira roo xat pam. Mina doxomangke at levelinga neni ga vaase nimi min ap mo levenaleng neni ga nemen to Galili; 7 ni ga lok keretna, ‘Diba song araba ia, Laradi Mevana ri limixin kapmek, la dinaba vaxarem ia ro at laxaba, la anaba roo xat amlong at laaleng sepsev avantun.” 8 La lavakin diga domangke at levelinga at ne Iesu.

9 La digamlong boro at lamaaut la diga tong na lempanga axap tinedi lasangaun legesara luvuttadi loklok ka anasa la tidi bok lentaba luvuttadi. 10 Mo lavakin diga tong na lempanga ri luvuttadi loklok ka anasa; levenasen atnedi, ne Maria Magdalene, Joana, la ne Maria nenen ne Jakop la lentaba bok. 11 Ketla luvuttadi loklok ka anasa diga nua i do levelinga at lavakin, ga levelinga gamasa mun, la di goxo nuunu atdi. 12 [Ketla ne Pita ga xatu kaxat la ga sixit kaxat uto at lamaaut; ni ga beles at lamaaut la ga ven labantamon diga bom ne Iesu min la kopmen bok tempanga. La neni gamlong ukolonu la gam doma mumu na lavanga.]

Lavatpas At Luradi Loklok Ka Anasa At Langas Uto Emaus

(Mk 16:12-13)

13 Ap mo mun laaleng lura atdi luvuttadi loklok ka anasa dugat pas uto at lara lemenemen laasen teren Emaus; lababaalom ti lavatpas boro Emaus uto Jerusalem i epovo at lasangaun mi legesa kilomita. 14 La duga epaase xantubu atdu mumu mo lempanga gat pot go. 15 Duga epaase la ne Iesu xa ga vot saparap du la ni ga emu eburu midu. 16 Duga ven i, ketla du goxo ven kisiv i.

17 La ne Iesu ga lok tidu, “Lai mo numu mu paase mumu i at na lavatpas atnumu?”

Duga ru pilo mi lainbulu. 18 La lara atdu, laasen teren ne Kliopas, ga lok, “Agut nenu xusuk mun u nemen kantubu at leme Jerusalem uxoklen lempanga salai mo gat pot go at na levenaleng gara xap.”

19 La ne Iesu ga sue du xeretna, “Lempanga salai?”

La duga vorang i rin keretna, “Mo lempanga ga rupot saparap ne Iesu boro Nasaret, anai laradi neni leeme vapaase alii la neni ga lok lempanga sangsangu la levelinga bok teren ga mumuat aleng at lemeren ne Moroa la limixin. 20 Lavamaasa silok atnama la luvuttadi amgomgo diga song araba i xusu na met, la diga vaxarem i at laxaba. 21 La maga doma ruturun i do neni laradi ne Moroa ga riki i xusu naba lox arooro limixin me Israel. Maxeneng bok at nom, monga lingina ni laaleng sepsev avantun pe i nom lempanga ga vot, 22 la lentaba lavakin at libinam tadi atnama di lox arakdu nema; dit pas maxantamak suubu uto at lamaaut. 23 Ketla kopmen dina long lenget ka labantuxu ren. Dimlong la di lok do nedi mo di ven lisilimet at luangelo la du tong i ridi do ne Iesu mo ia roo xat pam. 24 Lentaba at libinam tadi atnama dit pas uto at lamaaut la di ven i do levelinga at lavakin i ruturun; ketla kopmen dina ven ne Iesu.”

25 La ne Iesu ga lok tidu, “Nemu luradi rangtangku. Kereva, lodoxoma atnumu i repe vam la mu domampe levelinga at lavaeme vapaase alii? 26 Kereva, muxoklen i do Lanarong naba xip losongsongot at na lempanga la na beles at lixitkis orong teren?” 27 La ne Iesu ga soxomus levelinga at Lovoang Kaala ridu mumu i; ga ru ka i at levenbuk at ne Moses la levenmamalagan at lavaeme vapaase alii.

28 Diga vas saparap lemenemen mo duga lok do dunat pas tin; la ne Iesu ga lok do ni na vas basinge du. 29 Ketla duga vaase lolos alis i, la duga lok, “Una nemen be minama’ at na loxonaleng mila laaleng na, ira xantinao nga na la lemenemen na ira buxumin ta.” Kuren la ni ga vas beles ukeneng la ga nemen eburu midu.

30 La ni ga xis to at loxot kitkis eburu midu, la ga lok kaka loxongkide, la ga tong loklox anarong; melemu neni ga sebek loxongkide, la ga raba du min. 31 La lodoxoma atdu ga rem suang la duga ven kibis ba ne Iesu; ketla neni ga sonao basinge du. 32 La duga lok tidu xa, “Lebelen da iplivi aleng at loxonaleng neda ta ronga levelinga ren to at langas la ira soxomus Lovoang Kaala rida.”

33 La soso mun duga vas kaxat bilong uto Jerusalem, la duga vosiga nedi lasangaun legesara luvuttadi loklok ka anasa digak lox eburu bok mi lentaba. 34 Ketla luvuttadi loklok ka anasa diga lok tidu, “Leeme Silok ira xatu kaxat tuturun pam! Neni ira ru asuvos pam ti ne Simon!” 35 La nedu duga tong ba i ridi mi mo lavanga salai ga vot parap nedu ro at langas, la lemeren du ga xasep la duga ven kisip ba ne Iesu at loxonaleng neni ga sebek loxongkide.

Iesu Ga Ru Asuvos Ti Luvuttadi Loklok Ka Anasa Ren

(Mt 28:16-20; Mk 16:14-18; Jo 20:19-23)

36 Nedu move duga tong na lempanga ri luvuttadi loklok ka anasa, la soso mun ne Iesu ga ru go xantubu atdi la ga lok tidi, “Lenmila na nemen eburu minimi.”

37 Ketla diga umsu mi lainmarat aleng, diga nua i do nedi mo diga ven loroonan panga. 38 Ketla neni ga lok tidi, “Tila nemi mik marat? La tila levendoxoma atnimi ik sixit ekarakat? 39 Mina ven lukngak la luxangkedek tarak bok la mina ven i do nenia mun. Mina long tu rak, la miba ven kibis ia, mila loroonan panga kopmen tabantuxu la tevesi ren, ketla nenia a ruuna labantuxu mi levesi.”

40 [Ni ga tong i na la ni ga lox ase di mi lukngen la luxangkedek teren.] 41 Ketla kovisi di goxo nuunu, diga sangu la diga umsu mi lomomo; kuren la ni ga sue di, “Mi ruuna bok tempanga anan nade kusu ria ri anan?” 42 La diga raba i mi leemat tintin, 43 la ne Iesu ga lok ka i la ga anan i ro at lemeren di.

44 La neni ga lok tidi, “Anai lempanga nia aga tong i rinimi ap mo levenaleng nenia aga nemen eburu minimi; lempanga axap diga malagan i mumu ia keneng at Lenavolo at ne Moses, la levenmamalagan at lavaeme vapaase alii, la levempikpixan mo ira sorun.”

45 La neni ga lox arepalas levendoxoma atdi kusu dinakleklen avukat Lovoang Kaala, 46 La ni ga lok tidi, “Diga malagan i at Lovoang Kaala xeretna; Lanarong naba xip losongsongot la at laaleng sepsev avantun neni naba roo xat amlong. 47 La keneng at laasen teren diba tong asu Lagale Lavavang mumu loklok ti leeng la loklok ti doxoma xepe laxakapmek diba vavang min ti limixin axap at lavatbung menemen, ba ru ka i de Jerusalem. 48 La nemi miba tong asu na lempanga. 49 La nenia xa anaba riki mo laramtaba rinimi, mo ne Tamak gara xaape vam min do tinimi. Ketla miba nemen ngangais i ro Jerusalem se at loxonaleng lololos boro vana naba suxuna nimi.”

Moroa Ga Lam Ka Ne Iesu Uto Vana At Laxalibet

(Mk 16:19-20; Gu 1:9-11)

50 La ne Iesu ga lam ka nga di boro Jerusalem la uto Beteni, la ni ga song aurut mi lukngen la ga lox anarong di. 51 Se neni ga lox anarong pam di, neni ga on basinge di la ne Moroa ga lok kaka nga i uto vana at laxalibet. 52 Diga lotu saparav i la digamlong uto Jerusalem, diga umsu mi langsangan lomomo. 53 La at levenaleng axap diga nemen to at loogu laplavang diga veemi asu mi ne Moroa.